Tentang Pomparan ni Datu Lobi Nasumurung

Songon on ma partaromboon ni Ompu Datu Lobi Nasumurung.

Ia Siraja Lumbantoruan manang Borsak Sirumonggur ianakkon na 2 ima :

1.     Siraja Hutagurgur dohot

2.     Siraja Hariara

Ia Siraja Hutagurgur ianakkon na 2 ima :

1.    Tuan Hinalang dohot

2.    Raung Nabolon

Ia Raung Nabolon ianakkon na 4, ima :

1.    Hombar Najolo

2.    Pande Namora

3.    Ginjang Manubung dohot

4.    Datu Galapang

Ia Datu Galapang Pomparanna 2, ima :

1.    Tuan Guru Sinomba dohot

2.    Datu Lobi Nasumurung

Ia Datu Lobi Nasumurung ianakkonna ima :

1.    Gundur Samuana, tubu ni ompunta boru Sibuea;

2.    Ompu Batu Holing, tubu ni ompunta boru Sibuea;

3.    Ampartiang, tubu ni ompunta boru Situmorang;

TARINGOT TU POMPARAN NI OMPU DATU LOBI NASUMURUNG

Ia ianakkon ni Datu Galapang 3 ima, Tuan Guru Sinomba, Juaro Babiat dohot Datu Lobi Nasumurung. Di namarujung ngolu Juaro Babiat ndang adong tading-tading na sian ompunta Boru Situmorang. Andung ni ompunta boru Situmorang do patuduhon/paboahon na soadong dibortian, jadi ala ni i do umbahen diboan amana Situmorang ompunta boru i mulak tu Sibuluan.

 Ala na so martading tading do Juaro Babiat dipareak Datu Lobi Nasumurung ma ompunta boru Situmorang di Sibuluan, jala disi ma tubu sada anakna ima na margoar Ampartiang. Ndang diboto ompunta Boru Sibuea na masa i, alai tu angka ianakhonna ditonahon do taringot anak siampudanna i.

      Dipudian ni ari, laho ma pomparan ni Ompunta marboniaga/mardagang sahat tu Barus, Sidikalang Dairi. Marhoda boban do nasida laho tu Barus jala sai maradian ma di Huta Sibuluan.

Diparadianan i masitandaan ma dohot pangisi ni huta i, dipaboa parhuta i ma na sian Lintong Ni Huta do ompu nadisa najolo, margoar “Datu Lobi”. Mambege pandohan i gabe diingot angka parboniaga i ma tona ni Datu Lobi Nasumurung na mandok; “Anak siampudanna, Ampartiang, tubu ni ompunta boru Situmorang, na marhuta di Sibuluan”.

Ima mula ni parjumpangan ni pomparan ni Datu Lobi tubuna sian ompunta boru Sibuea tu Ampartiang tubu ni ompunta boru Situmorang. Ujungna dialap pomparan ni Datu Lobi Nasumurung ma nasida sian Sibuluan dohot sian Sihuting-Huting jala diojakhon ma marhuta di Lumban Matio Lumbanjulu. Pomparan ni Datu Lobi na lao mangalap anggidolina i sian Ompu Sumandar ima Ompu Gadja, sian Ompu Lobi Sigota-gota ima Raja Djaiutan, Raja Israel, Raja Polin, Ompu Ragam, jala sian Ompu Niambuan ima Ompu Badia. Jala goar ni pomparan ni Ampartiang na dialap i ima pomparan Ompu ni Ulosan rap dohot uduranna.

      Ditingki pesta tugu ni Ompu Datu Lobi Nasumurung taon 1922 dohot taon 1952 diadopi hahadoli Tuan Guru Sinomba dohot anggidoli Ampartiang jala tangkas do disurathon ianakkon ni Datu Lobi Nasumurung 3, ima ompunta Gundur Samuana dohot ompunta Batu Holing tubu ni ompunta Boru Sibuea dohot Ampartiang tubu ni ompunta boru Situmorang. Tingki i ulaon i ulaon Bus Lintong Ni Huta, na nidohotan ni pomparan Borsak Sirumonggur Sihombing Lumban Toruan, Silaban, Hutasoit, Sihombing Jae/Sihombing Julu dohot marga-marga na adong di Lintongnihuta.

      Diparbagianan ni tano ni Ompunta Datu Galapang dibagi dua do; ima di Hasundutan ma pomparan ni Ompunta Tuan Guru Sinomba jala di Habinsaran ma pomparan ni Ompunta Datu Ompu Lobi Nasumurung.   

     Dipangalaho paradaton masipanjouon jambar ma pomparan ni Datu Galapang ima sian Tuan Guru Sinomba dohot Datu Ompu Lobi Nasumurung.

-       Alai di taon 1967 tingki pesta marujung ngolu Gr.Wilmar Sihombing di Huta Mual, digorahon Tuan Guru Sinomba ma parjambaran ni JUARA BABIAT. Denggan do dialusi St.Mangaraja Lumbantoruan (Kuam) mangalap hata ditingki i mandok “molo songon i do pambahenanmu raja nami diulaonta on, mulak ma hami” ninna. Jadi mulak ma sian pesta i St.Mangaraja Lumbantoruan (Kuam), St.Kepas Sihombing, natua-tua ni Datu Lobi dohot parmusik/partarompet ni Sibuntuon.

-       Sian ari i ndang hea be digokkon pomparan ni Datu Ompu Lobi Nasumurung hahadoli Tuan Guru Sinomba diangka ulaon di bona pasogit Lintongnihuta.

Tu sude hita pomparan ni Ompunta Datu Ompu Lobi Nasumurung, sotung olo hita mandok na so anak ni Datu Ompu Lobi Nasumurung anggidolinta Ampartiang, asa unang mardosa hita.

Molo tung adong angka hata manang barita na so tingkos dohot angka “usaha” ni angka halak na asing laho mansoadahon i, unang tatolopi. Ai tu ripurna do halak na mansoadahon haha manang anggina.

Tapatolhas be ma sejarah dohot angka tona ni ompunta i tu angka ianakkonta be, asa lam tu tambana angka pasu-pasu ni Tuhan angka hagabeon, hamoraon dohot hasangapon dihita sude pomparan ni Datu Ompu Lobi Nasumurung.

Habang ambaroba, paihut-ihut huta

Tona ni ompunta, sitongka i muba-uba

Sian Sibaragas laho tu Pagaran,

sian Sitampurung ro tu Silait-lait

Horas ma hita sude na di parserahan,

horas ma nang di Bona Pasogit.

Dasar :

1.      Surat ni utusan Pomparan Datu Lobi Nasumurung Bona Pasogit tanggal 26 Mei 1995 na ditandatangani :

-   St.Gr.Salomo Lumbantoruan;

-   K.K.Mail Sihombing;

-   Tunggul Sihombing;

-   S.Bros (Budiman) Sihombing;

-   K.K.Bistok Sihombing;

-   St.Petrus Sihombing;

-   St.Mangara Lumbantoruan;

-   Gr.Willem Sihombing;

2.      Surat Pengurus Pusat Pomparan Datu Ompu Lobi Nasumurung Bona Pasogit Lintongnihuta Humbang tanggal 01 April 2006 na ditandatangani

-   Mangasi Sihombing (O.Lamro) Ketua Umum;

-   Kisaran Sihombing (O.Anita) Sekretaris Jenderal.

3.      Surat Boa-Boa Pengurus Harian Punguan Datu Ompu Lobi Nasumurung Jakarta & Nahumaliangna No.001/PPDLNS/VII/2007 tanggal 20 Juli 2007 ditanda tangani :

-   Sabar P.Sihombing (Ketua Umum)

-   Drs.Chrisman Sihombing (Sekretaris)

ditolopi Dewan Adat Pomparan Datu Ompu Lobi Nasumurung Jakarta & Nahumaliangna :

-   Thurman Sihombing (Ketua)

-   Drs.Ronald M.Sihombing (Sekretaris)

ditolopi Pengurus Pusat Pomparan Datu Ompu Lobi Nasumurung Bona Pasogit Lintongnihuta Humbang :

-   Mangasi Sihombing (Ketua Umum)

-   Kisaran Sihombing (Sekretaris Jenderal)

Parpadanan Datu Galapang dohot Naibaho.

Mansai godang angka pandohan,siguriton dohot angka na asing na mandokhon "adong parpadanan ni Naibaho tu Sihombing Lumbantoruan pomparan Datu Galapang. Molo pinatangkas tu angka natua-tua ni Lumbantoruan taringot tu parpadanan i ndang hantus alusna. Ra, nunga piga-piga hali tajaha jala tabege angka barita taringot tusi. Alani i,molo sian roha na ias do hita manimbangi (alai khusus tu pomparan ni Datu Galapang ma pandohan on) na masa i, dumengganan ma molo tadok "NDANG ADONG PADAN NI DATU GALAPANG TU NAIBAHO". Boasa ? Molo disungkun hita ahama "konkrit" ni parpadanan i, taboto do ? Molo adong mambahen alus "tongka paboa-boaon !" na boi ma i nilapatan "ndang diboto", boasa ndang diboto ? ala so adong padan i.
Mauliate.

Hubungan Pasaribu, Manullang dan Sinambela dengan Datu Lobi Nasumurung

Tolu do anak ni Datu Lobi Nasumurung, ima Gundur Samuana, Batu Holing dohot Ampartiang.
Ia anak si paidua ima na margoar Batu Holing 4 do ianakhonna, ima Ompu Sumandar, Ompu Lobi Sigotagota, Ompu Buntu dohot Ompu ni Ambuan. Molo pe diangka tarombo ni pomparan Datu Lobi Nasumurung ndang be tarida Ompu Buntu ima siala na punu do daompung i, ndang adong anakna alai adong do 3 boruna.
Boru sihahaan ima na marhamulian tu marga Pasaribu;
Boru sipaidua na marhamulian tu marga Manullang Datu Tala;
Boru sipaitolu ima na marhamulian tu marga Sinambela.
Ima hubungan ni na tolu marga i tu Datu Lobi Nasumurung. Mauliate.Horas